De 15. Mee 1992 hu sech 16 Kollegen an enger éischter Prouf am Casino syndical zu Bouneweg getraff fir d’akademësch Sëtzong vun der 75-Jor-Feier vun der Association des Douaniers Luxembourgeois A.D.L. am September 1993 ze verschéineren.

Well dat nach e laangen Dag wor bis dohinner a sech ëmmer méi Kollegen zesumme fonnt hunn, ass de Wonsch och ëmmer méi grouss ginn, fir duerno als Douane’s Musek weider ze bestoen.

An der Persoun vum Adjutant Pol Dahm vun der Militär-Musek wor séier en Dirgent fonnt ginn, deen, wéi sech lues a lues sollt erausstellen, gäeren ënnert den Douanieren wollt sin an d’Douanieren méi wéi zefridde woren mat sénger Aart a Weis eng Musek ze leeden.

E grousse Problem wor d’Sich no engem Prouwesall. No villem hin an hier huet d'Douane’s Musek e Prouwesall om Lampertsbierg fond.

Am Laf vun der Zäit sinn och schonn  verschidden Optrëtter ugehol ginn, wéi bei «En Dag am Minett» zu Bieles, den 20. September 1992, wat als éischt Sortie zeréckzehalen ass.

Duerno huet sech d'Douane’s Musek nach un der Matthäus-Feier - dem Patronatsfest vun den Douanieren - an um internationalen Finanzturnéier um Stadion Josy Barthel bedeelegt, an den 28. Juni 1993 gouf op der Place d’Armes en éischte Concert gespillt.

Den 11. September ass en zweete Concert zu Uespelt gespillt ginn, éier de 17. September 1993 op der schonn genannten akademëscher Sëtzong de «Marche des Douanes et Accises», komponéiert vun hirem Dirigent Pol Dahm, eng éischte Kéier opgefouert ginn ass.

Nodeems eng Woch duerno schonn erëm eng Kéier d’Matthäus-Feier wor, ass de 15. Oktober 1993 déi offizell Grënnongsversammlong ofgehale ginn.

Den Direkter Marc Schloesser ass, fir all séng Beméiongen, déi et méiglech gemat hun datt eng Musek an der Douane konnt op d’Been gestallt ginn, vun de Grënnongsmemberen eestëmmeg als Eierepresident proposéiert ginn, wat hien mat vill Freed ugeholl huet.

Den éischte Comité huet sech aus dëse Leit zesumme gedoen:

President: Jean-Pierre Reuter

Vizepresident: Francis Sauer

Secrétaire: André Friden

Keessier: Lucien Thommes

Assessoren: Christiane Weis, Carlo Thill an Armand Dichter

Well eise Frënd Fernand Schmit vu Gréiwemaacher, deen bis dohinner ëmmer mat sengem Fotoapparat do wor wa mir hien gebraucht hunn, eis knapp 3 Méint no der Grënnongsversammlung fir ëmmer verloos huet, krut de Carlo Thill d’Charge fir d’Musek am Bild festzehalen. Wéi de Guy Rausch am Carlo seng Platz an de Comité gewielt gouf, huet hien och d’Fotographéieren iwwerholl.

Wann een an der kuurzer Zäit wou d'Douane’s Musek elo besteet nach nët vu richtegen Traditioune ka schwätzen, esou ginn et awer verschidde Geleënheeten déi all Jor erëm kommen. Do sinn ze ernimmen d’Patronatsfest vun den Douanieren, dem hl. Matthäus, an de Concert op der Place d’Armes wou nach all Jor en Instrument fir d'Douane’s Musek konnt gesponsort ginn..

Well den Douane’s Bal, deen d'Douane’s Musek zënter 1994 mat dem Douane’s Football zesummen organiséiert, déi eenzeg grouss Recette ass fir déi lafend Onkäschten vum Jor ze decken, ass d'Douane’s Musek ganz staark op Sponsoren ugewisen fir iwwer d’Ronnen ze kommen.

Zesumme mat esou engem Sponsor konnt de 29. Mäerz 1996 zu Bartreng de Benefiz-Concert zu Gonschte vun S.O.S. Léierschwieregkeeten organiséiert ginn, deen duerch de soziokulturelle Radio 100,7 fir dës CD opgeholl gouf.

Et ass eng Selbstverständlechkeet datt een senge Memberen fir dat wat si fir de Veräin leeschten, vun Zäit zu Zäit eng Satisfaktioun an enger anerer Form gët.

1995 ass d'Douane’s Musek fir 3 Deeg op Antwerpen gefuer. Wéi si erëm heem koumen haten si d’Invitatioun fir 1996 op der 100-Jor-Feier vun der Antwerpener Douane’s Musek ze spillen mat an der Waliss. Als positiven Nieweneffet bei deem Concert wor d’Bekanntschaft mat der Aachener Zollkapelle. Esou konnten schon Auslandsoptrëtter zu Aachen an Calella/E vun der Douane’s Musek gefeiert ginn.

Mat der Zefriddenheet an der Begeeschterong mat der d’Kolleginnen a Kollegen an der Douane’s Musek derbäi sinn, et sin der elo schon 50, as nach esou munech schéi Stonn ze erwaarden.